न.पा.मुला मुलींची शाळा नं. ५ साठे नगर, मंगळवेढा येथे ‘सुरक्षित बचपन’ अभियानांतर्गत विविध कायदेविषयक शिबिर संपन्न

राष्ट्रीय प्राधिकरण नवी दिल्ली, व महाराष्ट्र राज्य विधी सेवा प्राधिकरण, मुंबई आणि जिल्हा विधी सेवा प्राधिकरण यांच्यावतीने सोलापूरचे अध्यक्ष, प्रमुख जिल्हा न्यायाधीश एम. एस. शर्मा यांच्या मार्गदर्शनाखाली व सचिव, अमोलकुमार देशपांडे यांचे सहकार्याने मंगळवेढा तालुका विधी सेवा समिती व मंगळवेढा विधीज्ञ संघ यांच्या संयुक्त विद्यमाने न.पा.मुला मुलींची शाळा नं. ५ साठे नगर, मंगळवेढा येथे सुरक्षित बचपन अभियानांतर्गत कायदेविषयक शिबिराचे आयोजन करण्यात आले होते. कार्यक्रमाच्या सुरुवातीला बालकांनी अतिशय छान पध्दतीने स्वागत गीताने सर्व प्रमुख पाहुण्यांचे स्वागत केले. या शिबीराच्या अध्यक्षस्थानी सह दिवाणी व फौजदारी न्यायाधीश एम. एस. माळी होत्या. न्यायाधीश एम. एस. माळी यांनी लहान वयातच विद्यार्थ्यांना स्वतःच्या हक्कांची जाणीव व्हावी, चांगला आणि वाईट स्पर्श ओळखता यावा तसेच कोणत्याही अडचणीच्या वेळी विश्वासू व्यक्तीला सांगण्याचे धैर्य मिळावे याबाबत मार्गदर्शन करुन त्यांनी त्यांचे मनोगत व्यकत केले. विशेष सहाय्यक सरकारी अभियोक्ता गौरी कुलकर्णी यांनी ‘माझं बालपण, माझा अधिकार’ या संकल्पनेवर आधारित लहान विद्यार्थ्यांना बालहक्क, बालसुरक्षा आणि सुरक्षिततेविषयी सोप्या भाषेत मार्गदर्शन करण्यात आले. बालकांना कोणकोणते अधिकार आहेत, बाल न्याय मंडळ म्हणजे काय, बाल शिक्षण कायदा इत्यादी माहिती देण्यात आली.

ॲड. अशुतोष लवटे यांनी ‘मेरा बचपन, मेरा अधिकार’ या विषयावर बालहक्क व बालसंरक्षणाबाबत मुलांना समजेल असे मार्गदर्शन केले. कायदा तथा परिवीक्षा अधिकारी, जिल्हा बाल संरक्षण कक्ष, महिला व बाल विकास विभाग, सोलापूर ॲड. सारीका हुक्केरी यांनी ‘कानून जानो, बचपन बचाओ’ या विषयातून पॉक्सो कायदा व कायदेशीर मदतीची माहिती दिली. तसेच १०९८ व ११२ या चाईल्ड हेल्पलाईनची माहिती दिली. सहा. पोलीस निरीक्षक विनोद लातुरकर यांनी ‘सुरक्षित क्लिक, सुरक्षित बचपन’ या विषयावर इंटरनेट सुरक्षितता, सायबर गुन्हे व ऑनलाइन शोषण व अयोग्य फाेटो शेअर करण्याचे धोके याबाबत मार्गदर्शन केले. ॲड. आफ्रीन शेख यांनी ‘बोलो, बताओ, बचाओ’ या विषयातून सुरक्षित-असुरक्षित स्पर्श, विश्वासु व्यक्तीकडे मदत मागणे व तक्रार प्रक्रियेची माहिती दिली, तर महिला व बाल विकास विभाग, सोलापूर डाटा एंट्री ऑपरेटर जयश्री पवार यांनी बालविवाह व बालशोषणाविरोधात जनजागृती करुन बालविवाह न करण्याची शपथ दिली. या कार्यक्रमास तालुका विधी सेवा समिती कर्मचारी अकिल दरवाजकर, विधीज्ञ संघाचे अध्यक्ष ॲड.राजु शेख, उपाध्यक्ष ॲड. महादेव गायकवाड ॲड. प्रथमेश दत्तु, ॲड. सीमा ढावरे उपस्थित होते. सदर कार्यक्रमास शाळेचे मुख्याध्यापक शिवानंद कोळी, सह शिक्षक श्रीमंत सोलनकर हजर होते. तसेच न्यायालयीन कर्मचारी विश्वनाथ मोरे, विधी स्वयंसेवक प्रतिक भोसले, मंगळवेढा तालुका समन्वयक, बाल विवाह मुक्त भारत अभियानचे ॲड. नितीन वाघमारे देखील उपस्थित होते. या कार्यक्रमाचे सूत्रसंचालन सहशिक्षक विशाल गायकवाड यांनी केले तर आभार सहशिक्षिका भाग्यश्री काळुंगे यांनी मानले. सदरचा कार्यक्रम सर्वांच्या सहकार्याने यशस्वीरीत्या पार पाडण्यात आला.